T NEWS मराठी नेटवर्क-
सिरोंचा(प्रतिनिधी) तब्बल आठ वर्षांच्या प्रतीक्षेनंतर सुरू झालेल्या आलापल्ली-सिरोंचा राष्ट्रीय महामार्ग 353C च्या कामामुळे परिसरातील नागरिकांचा जीव धोक्यात आला आहे. विशेषतः आलापल्ली ते गुड्डीगुडम या 16 किलोमीटरच्या रस्त्यावर निकृष्ट कामासोबतच उडणाऱ्या धुळीच्या साम्राज्यामुळे नागरिक त्रस्त झाले असून, श्वास घेणेही कठीण झाले आहे.
या गंभीर मुद्यावर सामाजिक कार्यकर्ते संतोष ताटीकोंडावार यांनी आक्षेप घेत, आगामी हिवाळी अधिवेशनात नागरिकांना सोबत घेऊन मोठे आंदोलन छेडण्याचा इशारा दिला आहे.
गेल्या दोन महिन्यांपासून कंत्राटदाराने या रस्त्यावर गिट्टी (Aggregates) टाकून ठेवली आहे, परंतु पुढील काम पूर्ण झालेले नाही. अर्धवट अवस्थेतील या कामामुळे रस्त्यावर धुळीचे मोठे लोट उडत आहेत.
– धुळीमुळे या रस्त्यावरून प्रवास करणे जीवघेणे झाले आहे.
-नागरिकांना श्वास घेण्यास त्रास होत असून, आरोग्य धोक्यात आले आहे.
– धुळीच्या साम्राज्यामुळे परिसर आणि दुकानांमध्येही अस्वच्छता पसरली आहे, ज्यामुळे स्थानिक नागरिक त्रस्त झाले आहेत.
निकृष्ट कामावर नागरिकांचा आक्षेप-
आलापल्ली-सिरोंचा मार्गाला राष्ट्रीय महामार्गाचा दर्जा मिळून आठ वर्षांचा कालावधी लोटला आहे. नुकतेच कंत्राटदाराने कामास सुरुवात केली असली तरी, कामाचा दर्जा निकृष्ट असल्याचा नागरिकांचा आरोप आहे:
आलापल्ली-गुड्डीगुडम या 16 किमी रस्त्याचे खोदकाम न करताच आणि आवश्यक पायाभूत थर तयार न करताच, काळ्या मातीवर थेट गिट्टी टाकून काम करण्यात येत आहे. कंत्राटदार शासनासोबत केलेल्या करारनाम्यानुसार काम न करता आपल्या मनमर्जीने काम करत असल्याचे दिसून येत आहे, ज्यामुळे सार्वजनिक निधीचा चुराडा होत असल्याची ओरड आहे.
रस्त्याच्या कामात एवढ्या मोठ्या त्रुटी असतानाही संबंधित विभागाचे अधिकारी रस्त्याच्या बांधकामावर भेट देत नाहीत. अधिकाऱ्यांच्या या दुर्लक्षामुळे कंत्राटदाराचे चांगलेच फावले आहे.
एकीकडे केंद्रीय मंत्री नितीन गडकरी यांनी राष्ट्रीय महामार्गाच्या कामात कोणतीही कुचराई खपवून घेतली जाणार नाही, असा कडक संदेश दिला असतानाही, कंत्राटदार आणि अधिकारी कामाच्या दर्जाबाबत गांभीर्य दाखवत नाहीत.
धुळीमुळे नागरिकांचा जीव धोक्यात आला आहे, हा मुद्दा अतिशय गंभीर असून, हिवाळी अधिवेशनात ताटीकोंडावार यांनी नागरिकांना घेऊन मोठे आंदोलन छेडण्याचा इशारा दिला आहे.
या परिसरातील नागरिकांनी या संपूर्ण कामाची सखोल चौकशी करण्याची, संबंधित कंत्राटदारावर कारवाई करून त्याला काळ्या यादीत (Blacklist) टाकण्याची मागणी केली आहे. निकृष्ट आणि अर्धवट कामामुळे हा रस्ता किती दिवस टिकेल, असा प्रश्न सर्वसामान्य उपस्थित करत आहेत.
